Pamumuhunan sa Ginto

Nung mga panahon na–ospital ang aking ina, ako ay nangailangan ng cash ng ora–orada! Meron akong pera pero ito ay nasa Stock Market. Puede akong magbenta ng Stocks pero ito ay mas mababa kesa nung ito ay binili ko. Meron din akong Treasury Bonds pero ito ay nakakandado sa loob ng 20 years at ang huling interes na aking natanggap ay pinamuhunan ko ulit sa pagbili ng Stocks sa Stock Market.

Ano ang aking naging salvacion? Ginto!!!

Meron akong mga gold biscuits (10 gramo ng ginto na 24 carats). Nabili ko ito nung huli kong  pag–viaje sa Dubai sampung taon na ang nakaraan. Nabili ko ito sa halagang 70 dirhams per gram. Nung 2012, pumalo ang presyo ng ginto sa Black Market sa Pilipinas sa halagang Php 2,000 per gram. At dahil halos doble na ang presyo nito kumpara noong taon na nabili ko ito, nagbenta ako ng sampung gramo para matustusan ang pangangailangan ng aking ina sa pagpapagamot. Meron pa akong mga natitirang ilang pirasong gold biscuit na aking itinatabi sakaling tumaas pa ulit ang presyo ng ginto.

Pero paano mo ba malalaman na hindi ka niloloko sa presyohan sa gintong iyong binebenta? Ito ang mga dapat mong tandaan:

(1)    Pumunta sa website ng Banco Central: www.bsp.gov.ph. Ito ang screenshot na iyong makikita:

(2)    Kailangan mo ang mga sumusunod na informacion: presyo ng ginto sa troy ounce, palitan ng piso laban sa dolyar.

(3)    Halimbawa ng pagkakalkula:

1 Troy ounce (24k) = 31.1 grams

1 Troy ounce = $1293.00

$1 = 52.594

                        $1293 x 52.594 = Php 68,004

                        Php 68,004 ÷ 31.1 = Php 2,187 per gram

Ang tanong,

Maibebenta mo ba ang iyong 24k ginto sa presyong katumbas na kalkulasyon sa itaas?

Sagot:

Hindi. Bibilhin yan ng buyer ng 20% na mas mababa (mga Php 1750 per gram) mula sa kalkulasyon sa itaas. Ito ay dahil ang presyo ng ginto ay tumataas o bumababa araw–araw at kailangan mayroong panangga ang buyer sa pag–iba–iba ng presyo ng ginto. Bukod pa sa kailangan ding tumubo ng buyer para naman sa kanyang negocio.

Mga tips sa pagbebenta ng ginto:

(1)    Mas mainam pang magbenta ng ginto sa Black Market dahil eksperto na sila sa pagkilatis ng ginto. Isang tingin lang at pagtimbang alam na nila kung ito ay tunay o peke. Ang mga tinatawag na Black Market ay ang may mga karatulang “Bumibili ng sirang alahas o ginto.”Mainam na magbenta sa may mga puesto dahil alam mong hindi ka tatakbuhan!

(2)    May mga pawnshop na kakaskasin ang iyong gold biscuit at meron ding iba na bubutasan nila sa gitna ang iyong gold biscuit. Kapag ito ay kanilang ginawa, mawawala na ang pagkakaeksaktong sampung gramo ng gold biscuit. Huwag na huwag niyong pabubutasan o pakikiskis ang inyong gold biscuit!

(3)    Kung plano mo lang isanla ang iyong gold biscuit, seguraduhin mong ang gold biscuit na dati mo nang naisanla ang isasanla mo ulit. Ang mga virgin na gold biscuit mo ay ilalaan mo sa pagbebenta sa tamang panahon.

(4)    May mga pawnshop na magiging interesado sa pagbili ng iyong gold biscuit na tataasan nila ang presyo ng pagkilatis para mahirapan kang matubos ito muli. Kung ang “appraise value” ay halos doble kesa noong ito ay binili mo, puede mo nang ipa –remata sa pawnshop ang iyong ginto kesa naman sa magtubo ka pa buwan– buwan. Kung may plano ka pang tubusin ang iyong gold biscuit, magsanla ka lang sa halagang kaya mong tubusin ito muli.

(5)    Ang Banco Central ay bumibil rin ng ginto mula sa mga tinatawag na “panner” or mula sa mga ordinaryong mamamayan pero isang katutak na papel at proseso ang iyong dadaanan at hihingan ka pa ng I.D. at mayroon pang “tax” kapag binili nila ito sa’yo. Kaya mabuti pang magbenta ka na lang sa Black Market.